Në numrin e fundit të gazetës "Illyria" datë 2-7 Prill 1999, u botua në gjuhën anglisht projekt-plani i parashtruar nga Voisllav Sheshel në tetor 1995 për spastrimin etnik të Kosovës. Voislav Sheshel është zevendës kryeministër dhe udhëheqës i Partisë Radikale të Serbisë.

Ky plan, i hartuar në bazë të memorandumit të Akademikut Çubriloviq "Kolonizimi i Kosovës dhe Dëbimi i shqiptarëve", që ai ja paraqiti qeverisë mbretërore të Stojadinoviçit në Beograd më 7 mars të vitit 1937, dhe që është aprovuar nga të gjithë pushtetarët shovinistë serbë, qofshin këta monarkistë, fashistë apo komunistë (vetë Çubriloviçi u shërbeu të gjithëve me besnikëri), tregon se tragjedia që po ndodh tani me popullin shqiptar të Kosovës, është paramenduar dhe planifikuar me kohë deri në hollësi. Fashisti Sheshel, që bashkë me vrasësit Millosheviq dhe Arkan, është bërë flamurtar i shovinizmit serb, parashtron me hollësi platformën e çpopullimit me forcë të Kosovës nga shqiptarët etnikë, e çpronësimit të tyre, duke sugjeruar edhe mjetet dhe mënyrat që duhet të përdoren për arritjen e këtij qëllimi, si shpërnguljen me hir apo pa hir të shqiptarëve, marrjen dhe zhdukjen e dokumentave të shtetësisë apo të pronës, mobilizimin e paraushtarakëve serbë, luftën psikologjike, eliminimin e intelektualëve dhe të udhëheqësve politikë nëpërmjet skandaleve, aksidenteve të kurdisura dhe deri në injektimin e tyre me virusin e AIDS-it.

Ngjarjet e kohëve të fundit, sidomos pas fillimit të bombardimeve të NATO-s, tregojnë se ky plan është shpalosur plotësisht dhe po vihet në zbatim me nxitimin më të madh. Qëllimi është që çpopullimi i Kosovës nga shqiptarët të bëhet një fakt i kryer. Skenat tronditëse të shqiptarëve, pleq, gra dhe fëmijë, që po detyrohen me forcë të braktisin truallin e tyre amtar po u ngjethin mishtë telespektatorëve në të gjithë botën.

Ky nuk është vetëm krimi më i madh i paramenduar kundër shqiptarëve, por është edhe krimi më i rëndë kundër njerëzimit pas Luftës së Dytë Botërore.

Platforma e genocidit antishqiptar e hartuar sa me urrejtje, aq dhe me hollësi nga Shesheli dhe mësuesët e tij, niset nga gënjeshtra e madhe, me të cilën është ushqyer populli serb qindvjeçarin e fundit. Ja çfarë thotë ai në hyrje të planit të tij vrastar "Një mijë vjetë më parë, guri i themelit i shtetit serb, i ndërgjegjes dhe i kulturës së tij kombëtare, u krijua në Metohi. Deri në atë kohë, asnjë shtet ligjor nuk ka ekzistuar në Kosovë dhe Metohi. Nga të gjithë popujt që kanë jetuar dhe punuar në këto territore gjatë kësaj kohe, rrënjët e popullit serb janë më të thellat dhe më të shtrirat". Një gënjeshtër absurde, që rrëzohet nga faktet historike, që mund të gjenden në çdo tekst historie të vendeve evropiane. Dihet se sllavët e jugut janë të ardhur në Ballkan (midis shekujve V dhe VI), dhe ata nuk erdhën në një vend të zbrazët. Në zonat, ku ata u vendosën, banonin fiset ilire, të cilët ishin të përfshirë në Perandorinë Bizantine. Dikur këtu kishin lulëzuar shtetet e Dardanëve. Ardianëve, Molosëve, Epirotëve etj., të cilët pas luftrash të gjata, ishin futur nën sundimin romak. Serbët, që kanë kaq shumë nostalgji për të kaluarën e tyre, është mirë t'i kërkojnë rrënjët e tyre në humbëtirat e Siberisë, nga dhe kanë ardhur.

Në betejën e Fushë Kosovës në shekullin XIV kundër hordhive turke, që përbën altarin e kombit serb, përveç princit Lazar, morën pjesë edhe shumë princër shqiptarë dhe popuj të tjerë të Ballkanit. Shesheli harron se pati një ndryshim të madh në fatin e princërve dhe popujve që ata udhëhiqnin në atë kohë. Ndërsa princi Lazar u vra, serbët jo vetëm iu nënshtruan turqve, por edhe u bashkuan me ta në luftën për zgjerimin e kufijve në Perëndim. Për ta rregulluar sa më mirë politikën me sulltanët, princërit serbë nuk ngurruan të bënin edhe lidhje krushqie me sulltanët dhe u bënë furnizuesit kryesorë të haremeve të Sulltanit. Dhe ata dërgonin atje bijat dhe motrat e tyre. Zoti Sheshel duhet ta di edhe më mirë këtë, në qoftë se e di mirë historinë e knjazëve dhe kralëve të Serbisë. Varri i princit dhe humbja në këtë betejë shërbeu për të krijuar mitin më të vjetër të historisë së tyre. Ne e kuptojmë fare mirë këtë. Vetëm varret e bëjnë një mërgimtar që ta ndjejë veten dikushi në një vend të huaj. Ky varr u shërbeu serbëve për të mos e ndjerë më veten të huaj dhe të paemër në dheun e huaj, ku kishin ardhur si qifqinjë të Bizantit. Tani ata kishin një varr ku mund të qanin. Tani ata kishin një histori, që mund ta mbronin, kishin një humbje për të cilën mund të krenoheshin. Ata u bënë banorë të Ballkanit dhe harruan humbëtirat nga kishin ardhur.

Ne shqiptarët e kuptojmë këtë. Sepse edhe vetë krenohemi dhe i nderojmë të gjithë burrat që japin jetën për lirinë dhe pavarësinë e atdheut. Por ajo që nuk pranohet është se ata harrojnë faktin se shqiptarët, banorë të stërlashtë të këtyre trojeve, kanë flijuar bijtë dhe bijat më të mira në luftë kundër invazioneve të pandërprera të agresorëve të huaj kundër trojeve të tyre, duke filluar nga romakët, vizigotët, ostrogotët, hunët, normanët, sllavët, turqit dhe përsëri serbët . Vërtet, princi Lazar, siç thuhet, luftoi kundër turqve, por muri ku u thyen hordhitë turke në vrullin e tyre kundër Perëndimit u bënë trojet shqiptare, u bë populli shqiptar me në krye Gjergj Kastriotin. Ndërsa princi Lazar është legjendë, edhe pse u vra vetëm një gjysëm shekulli më parë, bëmat e Gjergj Kastriotit Evropa i përjetoi dhe i mësoi në kohën që ato u bënë. 50 vjet më vonë nëpër Evropë qarkulloi me bujë libri i Marin Barletit "Historia e bëmave të Skënderbeut, princit të shqiptarëve". Dhe Gjergj Kastrioti u bë shëmbull frymëzimi për të gjithë evropianët e krishterë kundër agresionit turk.

Shqiptarët nuk u nënshtruan. Ata luftuan vite me radhë kundër hordhive turke dhe kundër bashibozukëve serbë që bashkoheshin me ta. Të cfilitur nga luftërat e gjata, të braktisur nga Evropa, për të mos u nënshtruar krejtësisht dhe për të mos humbur pushtetin, shumë princër shqiptarë pranuan nënshtrimin dhe konvertuan besimin: nga të krishterë u kthyen në myslimanë. Vonë shembullin e tyre e ndoqën dhe një pjesë e popullit të thjeshtë. Konvertimi në fenë myslimane në shkallë të gjerë nuk ka ndodhur më shumë se 150 vjet më parë.

Politika e egër antishqiptare e Perandorisë turke, propaganda e tërbuar sllavo-greke, intrigat e Fanarit kanë penguar gjithnjë që bota e qytetëruar të kuptonte faktin se shqiptarët janë muslimanë të konvertuar. Muslimanët shqiptarë janë ish të krishterë të kthyer në muslimanë për të shpëtuar jo më tepër nga dhuna turke, se sa nga politika asimiluese e shovinistëve fqinjë serbë dhe grekë, që bëhej kryesisht nga kisha ortodokse sllavo-bizantine dhe që është përkrahur dhe të mbështetur gjithnjë nga politika sllavofile e Rusisë.

Fashistit Sheshel dhe të gjithë bandës kriminele që drejton tani shtetin serb u bëjmë të qartë se shqiptarët janë në trojet e tyre që prej kohësh që historia e shkruar nuk i mban mend. Dihet kur kanë ardhur grekët, romakët, sllavët, por nuk dihet se kur kanë ardhur ilirët, sepse ata kanë qenë banorë autoktonë. Dihet gjithashtu se në asnjë rast shqiptarët, pasaardhës të ilirëve, nuk kanë bërë asnjë agresion kundër të tjerëve, por kanë luftuar vetëm për të mbrojtur trojet e tyre.

Populli shqiptar i Kosovës që jeton në trojet e tij etnike në Kosovë nuk duron më të jetë një koloni në mes të Evropës së qytetëruar.

Ai dëshiron të hyjë i lirë dhe i pavarur në shekullin XXI. Dëshiron të vendosë vetë për fatin e tij. Dëshiron të fitojë kushtin e tij njerëzor, të cilin janë përpjekur t'ia mohojnë. Të ecë i lirë në rrugën demokratike krahas të gjithë popujve të lirë dhe demokratë të botës.

Bota e qytetëruar dhe demokratike po e sheh dhe po e kupton se shovinistët serbë janë duke kryer një krim të shëmtuar dhe të paramenduar kundër një populli që kërkon të jetojë i lirë në tokën e vet.

Për të riorganizuar shtetin dhe për të ndryshuar institucionet e federatës dhe të autonomive territoriale, që, sipas tij kanë qenë fatale për popullin serb, Shesheli deklaron se "Zgjidhja më e mirë do të jetë të ndërtohet një shtet i vetëm që do të përfshijë Republikën Serbe të Krajinës, Republikën Srpska, Republikën e Serbisë dhe Republikën e Malit të Zi".

Sipas tij, shteti serb do të ketë një president, një parlament, një qeveri, ndërsa "krahinat do të jenë ndermjetëse midis administratave lokale dhe qeverisë qendrore>

"Heqja e autonomisë ekzistuese të Kosovës dhe Metohisë, nga e cila është krijuar një pabarazi fatale në Serbi dhe janë pajisur shqiptarët me një bazë për të kërkuar ndarje, është elementi kryesor i realizimit të çështjes kombëtare serbe", thotë Shesheli.

Më poshtë ai thotë: "Përfshirja e plotë e Kosovës dhe Metohisë në një shtet unik serb është një çështje e brendshme dhe duhet të zgjidhet si e tillë pa arbitrazh të jashtëm nga i ashtuquajturi komunitet ndërkombëtar"

Cilat janë rrugët, sipas Sheshelit, për integrimin e Kosovës në shtetin serb?

Promulgimi i një ligji që privon shqiptarët nga shtetësia

Së pari, sipas tij, është e domosdoshme që parlamenti federal të adoptojë ligjin e shtetësisë. Ky ligj do të përcaktojë se të gjithë shqiptarët që kanë hyrë ilegalisht gjatë periudhës 1941-1987, numri i të cilëve sipas "statistikave të shpikura" të zotit Sheshel (sepse plot shqiptarë nga Kosova janë shpërngulur në Shqipëri dhe asnjë shqiptar nga Shqipëria nuk është shpërngulur në Kosovë gjatë kësaj periudhe) arrin shifrën 400.000, nuk do të marrin shtetësi dhe nuk do të mund të jetojnë në këtë vend. Në vend të tyre do të vendosen me ligj 400.000 refugjatë serbë nga republikat e shkëputura të Jugosllavisë.

"Dy rregulla, sugjeron Shesheli, do të aplikohen për të eleminuar emigrantët: ata që e kanë provuar se janë ekstremistë do të dëbohen menjëherë, ndërsa të tjerët duhet të kenë dokumentat përkatës, sidomos çertifikatën e shtetësisë, gjë që asnjëri prej tyre natyrisht nuk do ta ketë ... Mungesa e këtij dokumenti (e "çertifikatës së atdhetarisë" siç e quan ai) do të shërbejë si bazë për dëbim. Duhet të parandalohet riatdhesimi i shqiptarëve që janë me punësim të përkohshëm në vendet e huaja , sidomos i atyre që janë larguar gjatë periudhës 1990-1993 (vlerësohet se numri i tyre është rreth 300.000 vetë). Do t'u refuzohet punësimi disa njerëzve me profesion të caktuar, kështu që ata do të detyrohen të largohen... Këto masa së pari dhe mbi të gjitha do të prekin pjesën e arsimuar të popullsisë së tyre, kështu që pjesa tjetër do të manipulohet me lehtësi dhe nuk do të jetë në gjendje të bëjë rezistencë".

" ... duhet të promolgohet një ligj special, në bazë të të cilit të gjitha tokat dhe pasuritë e tjera të shqiptarëve do t'u kthehen serbëve dhe Kishës Ortodokse Serbe të Kosovës dhe Metohisë... Duke zgjeruar tokat dhe pasuritë e tyre, manastiret do të realizojnë në një mënyrë të shkëlqyer misionin e tyre fetar, kultural dhe kombëtar..."

" ...Gjatë ngjarjeve që ndodhën në gjysmën e dytë të shekullit të 20-të, vetëm priftërinjtë serbë qenë ata që nuk lëvizën nga Kosova. Kështu që, në saje të patriotizmit të tyre dhe të së drejtës së tyre të trashëgimisë, ata meritojnë të kenë prona të mëdha.

... Tokat që u janë shitur shqiptarëve ose që në një mënyrë apo në një tjetër kanë rënë në duart e tyre, duhet t'u kthehen ish pronarëve serbë ose trashëgimtarëve të tyre ..."

... Ka plot toka të shtetit që mund t'u jepen apo shiten serbëve që do të vijnë nga jashtë Kosovës dhe Metohisë ...Shtojmë se tokat e kooperativave bujqësore janë të mjafta për të vendosur një numër të madh kolonistësh ...Eshtë fare lehtë që të përqendrohen në këto toka serbë, të cilat do të bashkëpunojnë ngushtë me qendra të tjera të këtij lloji për të dhënë ndihmë në zhvillim. Vendosja e një zinxhiri qendrash të tilla është e mundshme në zonat e Deçanit, Prizrenit dhe Suharekës, ku, pasi të dëbohen shqiptarët, një barrikadë e fortë mbrojtëse kundër Shqipërisë do të jetë e sigurt.

"Kolonizimi i Kosovës dhe i Metohisë duhet të realizohet shpejt dhe përfundimisht. Nëpërmjet propagandës politike, kolonistët do të paraqiten si serbë që popullojnë tokën serbe dhe nuk ka rëndësi në ç'pjesë të vendit ata jetojnë, përsa kohë që jetojnë në vendin e tyre. Këta serbë do të pajisen me vegla dhe hua afatgjata, kështu që mund të kultivojnë tokën që u është falur, e cila do t'i bëjë të mos ikin".

Ligji i Ndalimit të Shitjes së Pronave të Patundshme do të respektohet plotësisht dhe do të bëhen të gjitha përpjekjet për zbatimin e dispozitave të tij në shkallën e plotë dhe të duhur. Në këtë drejtim, përgjegjesinë më të madhe e ka Ministria e tanishme e Financave e Republikës së Serbisë, e cila në fakt në shumicën e rasteve nuk e ka zbatuar këtë ligj.

Të gjithë shqiptarët që nuk janë shtetas, gjë që mund të provohet lehtë me anë të regjistrimit të popullsisë, do të pushohen nga puna. Të gjithë shqiptarëve që do të duan të ikin do t'u jepen pasaportat. Shqiptarët me shtetësi jugosllave por që jetojnë jashtë apo që janë të përfshirë në aktivitete secioniste duhet ta humbasin shtetësinë.

Duke marrë parasysh shpërndarjen e tanishme etnike (vetëm pak enklava rurale serbe dhe mbi 700 qendra thjesht shqiptare) ... ne mendojmë se kolonizimi duhet të realizohet në një mënyrë të organizuar, nëpërmjet krijimit të fshtrave, qendrave dhe qyteteve të vogla të reja ose të lagjeve të reja në qytetet ekzistuese.

Në këtë mënyrë populli mund të ndahet sipas linjës etnike, ndërsa popullsia serbe në minoritetet në lagjet e përzjera nëpër qytete do të kalojë gradualisht në enclavat e porsakrijuara, ide kjo që kërkon si mbështetje, ashtu edhe motivim. Me qëllim që enclavat serbe të jenë mbrojtura, një popullsi shqiptare prej 5 deri 10 përqind do të instalohet atje (një përzgjedhje familjesh të shquara dhe me autoritet).

"Enkalavat serbe do të varen kryesisht nga furnizimet e shtetit, ndërsa zonat shqiptare kryesisht nga firmat private ... furnizimi me energji elektrike dhe ujë për enkalavat shqiptare mund të ndërpritet për ta bërë jetën e tyre të padurueshme.

"Por në qoftë se serbët i gjejnë tërheqëse enklavat shqiptare fqinje (me dyqane private, vende dëfrimi etj.), kjo mund të eleminohetduke provokuar incidente në këto enklava, si rrahje dhe dhunë.

Duhen marrë të gjitha masat e nevojshme për të mos lejuar funksionimin e sektorit privat shqiptar nëpërmjet kufizimit të përhershëm të aktivitetit të tij, gjë që do të rezultojë në një kontroll të fortë të fondeve të partive të tyre politike... Nëpërmjet legjislacionit përkatës dhe politikës përkatëse tatimore, sasi të mëdha parash mund të mblidhen dhe të përdoren programe të tilla si kolonizimi.

Shqiptarët kanë qef të përdorin procedurat e tyre fisnore për zgjedhjen e grindjeve dhe e urrejnë ndërhyrjen administrative në ato sfera të jetës, që ata i quajnë të rëndësishme. Do të adaptohet një ligj i tillë që do t'i detyrojë shqiptarët të kërkojnë leje bile për të mbajtur edhe një lopë. Zbatimi i këtyre ligjeve do t'i detyrojë ata të ikin jashtë dhe të përballen me pengesa serioze në kufi kur të tentojnë të kthehen. Përsa u përket enklavave serbe procedurat do të jenë më pak të komplikuara, ndërsa në qytete ku shërbimet janë të përbashkëta për të gjithë komunitetin, si në Ministrinë e Punë të Brendshme, qytetarët e kombësive të ndryshme do të trajtohen në mënyra të ndryshme.

Këto procedura do të rezultojnë padyshim me pakënaqësira në komunitetin e tyre, që do të jetë një parakusht për një gatishmëri të gjerë për t'u futur në organizata të ndryshme, duke përfshirë ato terroriste. Prandaj individë nga sigurimi i shtetit mund "të infiltrohen" si agjentë që do të bëhen nxitës për organizimin e këtyre organizatave ilegale apo armiqësore, ose edhe të bëhen lider të këtyre grupimeve. Këto dredhi do të shfrytëzohen nga shteti si pretekst për ndërmarrë veprime të papajtueshme kundër të gjitha organizatave, që do të rezultojnë në tensione ndëretnike dhe çarje të mëtejshme në jetën e tyre paralele. Për këtë qëllim, gjithmonë e më shumë grupe do të duhen, ndërsa policia herë pas here do të shkatërrojë një prej tyre, që pastaj do të lejohet të konsolidohet përsëri dhe të duket si një organizatë e vërtetë dhe "bona fide" (e besueshme). Partitë politike të shqiptarëve duhet të krijohen nëpërmjet një legjislacioni të veçantë dhe në të njëjtën kohë duhet të krijohen skandale për t'i diskredituar ato. Kjo do të diskreditoj udhëheqësit e tyre në sytë e opionit publik vendas dhe të huaj, gjë që ka një rëndësi të veçantë për shqiptarët.

Individë të shquar që luajnë rol të rëndësishëm në jetën e tyre politike duhet të eleminohen nëpërmjet skandaleve ose duke inskenuar aksidente trafiku, vrasje nga xhelozia apo duke i infektuar me virusin e AIDS-it kur udhëtojnë jashtë shtetit. Infektimi i tyre do të zbulohet kur të kalojnë kufirin dhe ata do të futen në karantinë. Duke bërë propagandën e përshtatshme në masmedian e tyre ngjarje të tilla mund të krijojnë një tablo artificiale të një përqindjeje të padurueshme njerëzish të infektuar, që do të përdoret si pretekst për të izoluar grupe të mëdha njerëzish. Kjo do të ndihmojë për t'i paraqitur shqiptarët si një popull i infektuar.

Të transmetohen programe të radios dhe televizionit në gjuhën shqipe, që do të synojnë të çrrënjosin mentalitetin e tyre patriarkal dhe fisnor duke iu ofruar vlerat më dekadente të Perëndimit, që mund të adoptohen lethtë nga njerëzit primitivë. Enklavat serbe do të shpëtojnë nga këto programe kryesisht për shkak të pengesave gjuhësore, por edhe duke vendosur një televizion me kabllo ne godinat dhe banimet e ndërtuara për serbët.

Ka shumë rëndësi që të krijohet një makineri e fuqishme dhe efikase propagandistike për të ushqyer opinionin publik, diçka si ajo që tashmë është duke u përdorur.

Shqiptarëve duhet t'u refuzohet çdolloj asistence publike, sepse ajo ka lehtësuar lindjet e larta midis tyre. Përqindja e lindjeve midis minoriteteve të fesë muslimane ka rezultuar në një shtim të lartë të popullsisë në Kosovë dhe Metohi. Një gjë e tillë krijon një surplus demografik, prandaj emigracioni i shqiptarëve është i domosdoshëm dhe duhet të bëhet pandonjë presion nga autoritetet serbe.

Eshtë e domosdoshme që në Kosovë dhe Metohi të hapen shkolla dhe akademi ushtarake dhe të policisë, institucione plotësuse ushtarake dhe institucione të tjera që do të lejojnë të vendosen atje mijëra oficerë të ushtrisë, policë, nëpunës, bashkë me familjet e tyre dhe me infrastrukturën e nevojshme për jetën e tyre normale. Të gjithë serbëve që duan të jetojnë në këto zona duhet t'u jepet falas tokë pjellore, godina dhe lokale për bizneset e tyre private. Ata që do të kenë mbi 10 punëtorë do të lirohen nga taksat për 10 vjet dhe do të kenë lehtësi të tjera.

Oficerë në pension nga radhët e oficerëve, policëve dhe nëpunësve mund t'i zgjidhin problemet e tyre të banimit duke u dhënë apartamente të reja komode dhe sa më të gjera në rajonin e Kosovës dhe Metohisë. Brezi kufitar, minimumi 50 kilometra nga Shqipëria duhet të shfrytëzohet për vendosjen e Serbëve. ... Zona kufitare afër Shqipërisë duhet të banohet ekskluzivisht me serbë, ndërsa pjesa tjetër e tokës duhet të jetë pronë e ushtrisë jugosllave.

Gjuhë e mësimit duhet të jetë serbishtja... Shkollat ku do të përdoret gjuha e minoriteteve duhet të trajtohen si private, ndërkohë që ai që do të ketë një punë duhet të provojë se ai ka kryer shkollën me një program të plotë shtetëror....

Universiteti shtetëro i Prishtinës ka bërë ndryshime radikale dhe është në rrugë të mbarë për të arritur rezultate të mëdha.

Duhet të bëhen përpjekje për të ruajtur dhe për inkurajuar më tej arsimin paralel ilegal të shqiptarëve, sepse në këtë mënyrë ata do t'i kenë dyert të mbyllura për punësim dhe për t'u futur në shoqëri. Duhet të bëhen të gjitha përpjekjet për ta shpërndarë këtë popullsi në të gjithë botën, duke përfshirë Maqedoninë dhe Shqipërinë.Këto aktivitete do të reaalizohen në një kohë me forma të tjera presioni dhe duke krijuar tek ata ndjenjën e pasigurisë...

Ligji për ushtrinë do të jetë aq i rreptë sa do të detyrojë çdo shtetas të Jugosllavisë të kontribuojë për mbrojtjen e vendit, ndërsa anëtarët e pakicave kombëtare do të kontribuojnë me para ose punë.

Brenda ushtrisë është e domosdoshme të legalizohet veprimtaria e çetave guerilase çetnike, që do të vendosen në pika me rëndësi strategjike në Kosovë dhe Metohi.

Forcat policore në Kosovë dhe Metohi do të përfshihen ekskluzivisht në mbrojtjen e banorëve serbë si njërëz të rrezikuar në këtë rajon.

Rruga, nëpër të cilën ushtria serbe u tërhoq në vitin 1915 ka përcaktuar në një mënyrë të qenësishme drejtimin e autostradës së ardhshme (Nish, Prishtinë, Podgoricë, Bar), që në një mënyrë të sigurtë do të lidhë Serbinë me Malin e Zi dhe Detin Adriatik, via Kosovë dhe Metohi.

Gjendja e tanishme në Kosovë dhe Metohi mund të rezultojë me konsekuenca të paparashikueshme, sidomos në se faktorët e jashtëm do të duan ta zbatojnë një skenar të tillë. Prandaj një vemendje e veçantë duhet t'i kushtojmë aksioneve preventive, para së gjithash kapjes së çdo lloj arme, me leje ose pa leje, në mënyrë që të neutralizojmë të gjitha formacionet paraushtarake, parapolicore dhe paraterritoriale. Në rast se duhet të bëjmë luftë për të mbrojtur Kosovën dhe Metohinë, ajo duhet bërë me të gjitha mjetet e mundshme që të përfundojë sa më shpejt. Nuk do të fillojnë bisedime apo bëhen marrëveshje me përfaqësuesit e shqiptarëve para se ligji i shtetësisë të aprovohet dhe pa ditur numrin e saktë të atyre që njohin dhe pranojnë këtë shtet si shtetin e tyre.

Me ata shqiptarë që duan të jenë shtetas të Serbisë apo Jugosllavisë, shteti duhet të jetë më tolerant, dhe ata mund të përfshihen në institucionet shtetërore dhe politike, nëqoftë se ata pranojnë shtetin serb dhe ligjet e tij.

Botuar në gazetën "Illyria", New York, 8 Prill 1999

Back to Top